Monday, February 22, 2016

ஈழத்துப் பண்டாரவன்னியனும், வன்னியர்களும் வன்னியர்சாதியினர் அல்ல!



கலைஞர் கருணாநிதி அவர்கள் 'பாயும் புலி பண்டாரவன்னியன்' என்ற நூலை எழுதி ஈழத்தில் அடங்காப்பற்று என்று அழைக்கப்பட்ட வன்னி மண்ணின் குறுநில மன்னன் பண்டாரவன்னியன் வெள்ளையர்களுக்கு கப்பம் கட்ட மறுத்து கடைசிவரை அவர்களை எதிர்த்துப் போரிட்டு மடிந்த வரலாற்றை தமிழ்நாட்டில் பிரபலமடையச் செய்ததிலிருந்து, எதையுமே சாதியடிப்படையில் பார்ப்பது மட்டுமன்றி, தமிழர்களின் புகழ்பெற்ற மன்னர்களை தமிழர்களாக மட்டும் பார்க்காமல், அவர்களின் வரலாற்றிலும், வீரத்திலும் பெருமையிலும் சாதி, மத வேறுபாடின்றி தமிழர்கள் அனைவருக்கும் பங்குண்டு என்பதை மறந்து அவர்களைச் சாதியடிப்படையில் பங்கு போட்டுக் கொள்ளும் நோய் கொண்ட தமிழ்நாட்டுத் தமிழர்கள் சிலர், ஈழத்தமிழனாகிய பண்டாரவன்னியனுக்கு, சாதிப்பூச்சை அதாவது  வன்னியர் சாதி லேபலைக் குத்தி விடுவார்களோ என்ற பயம், வினவு இணையத் தளத்தில் நடைபெறும் விவாதத்தைப் பார்க்கும் போது ஏற்படுகிறது. அங்கே இலங்கையில் வன்னியர் சாதியினர் உண்டு என ஒருவர் வாதாடுகிறார். அது எவ்வளவு தவறானது என்பதையும், இலங்கையில் வன்னியர் என்ற சாதிப்பிரிவினர் கிடையாது, வன்னிக்கும், அல்லது பண்டாரவன்னியன் போன்ற வன்னிய அரசர்களுக்கும், தமிழ்நாட்டிலுள்ள வன்னியர்சாதிக்கும் எந்தத் தொடர்புமில்லை என்பதை விளக்குவது தான் இந்தப் பதிவின் நோக்கமாகும்.

தமிழ்நாட்டு வன்னியர் சாதியினருக்கும்  எனக்கும் எந்தவித மனத்தாபமோ அல்லது முரண்பாடோ கிடையாது. ஈழத்தமிழர்களைப் பொறுத்த வரை, சாதி மத வேறுபாடின்றி தமிழ்நாட்டுத் தமிழர்கள் எல்லோருமே எங்களின் சகோதரர்கள், அவர்கள் என்றைக்கு தமது சாதிச்சண்டைகளை நிறுத்தி விட்டு தமிழர்களாக ஒன்றுபடுகிறார்களோ, அதைப் பார்த்து முதலில் மகிழ்ச்சியடைகிறவர்களும் பெருமைப்படுகிறவர்களும் என்னைப்போன்ற ஈழத்தமிழர்களாகத் தானிருப்பார்கள்.

கலைஞரின் பாயும் புலி பண்டார வன்னியன் கதையையும், பெயரையும் பார்த்தது விட்டு, அவனும் வன்னியர்சாதி என எண்ணி அதை ஊதிப் பெருக்கி, ஈழத்திலுள்ள  பல கற்பனைக் கதைகளின் அடிப்படையில் பண்டார வன்னியனுக்கும் தமிழ்நாட்டு வன்னியர் சாதிக்கும் எதோ தொடர்பிருப்பது போன்ற கருத்து தமிழ்நாட்டில் பரப்பப்பட்டு விட்டது என்பது தான் உண்மை. நான் இப்படிக் கூறுவதன் மூலம், இலங்கைக்கும் தமிழ்நாட்டு வன்னியர்களுக்கும் எந்த தொடர்புமில்லை என்று கருத்தல்ல. 

வன்னியர்கள் என்று இக்காலத்தில் அழைக்கப்படும் பள்ளி சாதியினர் மட்டுமன்றி, பல்வேறு சாதிகளைச் சார்ந்த தமிழ்நாட்டுத் தமிழர்களும் சோழர்களின் படையெடுப்பின் போதும், சிங்கள/தமிழ் அரசர்களுக்குக் கூலிப்படைகளாகவும், பஞ்சம் பிழைக்கவும், கோயில்களுக்கு வேலையாட்களாகவும் வரலாற்றுக் காலம் தொட்டு இலங்கைக்கு வந்துள்ளனர் என்பதை திருக்கோணமலைக் கல்வெட்டுகளும், திருக்கோணமலை மான்மியம், மட்டக்களப்பு மான்மியம் போன்ற கவிதை நூல்ககளிலும் குறிப்பிடப்பட்டுள்ளது. தமிழ்நாட்டுத் தமிழர்கள் மட்டுமன்றி மலையாளிகளும், வடுகர்களும், வடவர்களும், முசல்மான்களும் கூட எங்களின் நாட்டுக்குப் பஞ்சம் பிழைக்க வந்துள்ளனர். அவர்களுக்கெல்லாம் சோறு போட்ட வளமான நாடு எங்களின் ஈழமணித்திருநாடு, ஆனால் அதைப் பற்றி பேசுவதல்ல, இந்தப் பதிவின் நோக்கம்.

  வன்னியர் என்பது தமிழில் இலங்கையில் மட்டுமன்றி தமிழ்நாட்டிலும் வரலாறு காலம் தொட்டு வன்மம் அதாவது வலிமை அல்லது வீரம் கொண்ட அனைவரையும் குறிக்கும் சொல்லாகவே இருந்ததல்லாமல் அது குறிப்பிட்ட சாதியைக் குறிக்கவில்லை. அந்த அடிப்படையிலும் தான் வன்னியை ஆண்ட வீரம் நிறைந்த மன்னர்களும் வன்னியர் என அழைக்கப்பட்டனரே தவிர, சாதி அடிப்படையில் அல்ல.
பண்டாரவன்னியனும் சாதியில் வேளாளர், 
வன்னியன் என்பது வெறும் பட்டமே ! 
இலங்கையில் வன்னி என்று குறிப்பிடப்படும் யாழ்ப்பாணக் குடாநாட்டுக்கு வெளியே உள்ள காடுகள் செறிந்த பரந்த நிலப்பரப்பு வன்னி என்று அழைக்கப்படுவதற்கும், தமிழ்நாட்டில் இப்போது வன்னியர்சாதி என்றழைக்கப்படும் குழுவினருக்கும் தொடர்பும் கிடையாது என்பது தான் உண்மை. 

வன்னி மரங்கள் செறிந்த வனமாக (காடாக) இருப்பதால் தான் வன்னி என்றழைக்கப்பட்டதே தவிர வன்னிய சாதி மக்கள் வாழ்ந்ததால் அல்ல. யாழ்ப்பாண அரசர்களுக்கு அடிபணிந்து கப்பம் கட்ட மறுத்த குறுநில மன்னர்கள் ஆண்ட நிலத்தை அடங்காப்பற்று அல்லது வன்னி எனவும், அதையாண்ட குறுநில அரசர்கள் வன்னிமைகள்(Chieftains) எனவும் அழைக்கப்பட்டனர். அவர்களுக்கும் தமிழ்நாட்டிலிருந்து இலங்கைக்கு பல்வேறு காலகட்டங்களில் குடியேறிய வன்னியர்களுக்கும் தொடர்பு கிடையாது.

அது மட்டுமன்றி சிங்களவர்கள் மத்தியில் கூட, சிங்கள வன்னிப்பகுதிகளை ஆண்ட சிற்றரசர்கள் வன்னியர்கள் எனவே அழைக்கப்பட்டனர்.. பண்டாரவன்னியனின் தங்கை நல்லநாச்சியார் கூட மணந்தது அனுராதபுரம் வன்னிமையை சார்ந்த சிங்கள/தமிழ் வன்னி அரசர்கள் குடும்பத்தில் தான் எனவும் கூறுவர். அது மட்டுமன்றி குலசேகரம் வைரமுத்து பண்டாரவன்னியன் மனைவி கூட தமிழ்/சிங்கள வன்னியர் குடும்பத்துப் பெண்ணைத் தான். ஆகவே  இங்கே வன்னியர் என்பது வன்னிப்  பகுதியில் வாழ்ந்த மக்கள் அனைவரையும் குறிக்கிறதே தவிர குறிப்பிட்ட வன்னியர் என்ற சாதிக் குழுவினரை அல்ல.

நான் ஏதோ யாழ்ப்பாண வெள்ளாளருக்கு ஆதரவாகப் பேசுகிறேன் என சிலர் நினைக்கலாம். இலங்கையில் வன்னியர் என்ற சாதி கிடையாது. அதிலும் உண்மை என்னவென்றால் யாழ்ப்பாண அரசர்கள் மட்டுமன்றி பண்டார வன்னியன் போன்ற வன்னி அரசர்களும் கூட சாதியடிப்படையில் பார்த்தால் சைவவெள்ளாளர்களே தவிர வன்னியர்கள் அல்ல. வன்னியின் கடைசி மன்னன் பண்டாரவன்னியனிடமிருந்து ஆட்சியைக் கைப்பற்றிக் கொண்ட ஒல்லாந்தர் ஆட்சியாளர்களின் குறிப்புக்களே அதைத் தெளிவாகத் தெரிவிக்கின்றன. அது மட்டுமன்றி, வன்னி நிலம் ஒல்லாந்தர்களின் கைகளுக்கு மாறிய பின்னர், பெயருக்குக் கிறிஸ்தவர்களாகவும் மாறி,  அவர்களுக்கு யானைகளை கப்பமாகக் கொடுத்து ஆண்ட வன்னிமைகளில் டொன் பிலிப்பு நல்லமாப்பாணன் போன்றோர் வெள்ளாளர்களே தவிர வன்னியசாதியினர் அல்ல. இன்றும்  மாப்பாண முதலியார் குடும்பம் என்பது யாழ்ப்பாண சைவ வெள்ளாளர்களே தவிர வன்னியர் சாதியினர் அல்ல.

    தமிழ்நாட்டில் இன்று வன்னியர் சாதி என அழைக்கப்படும் சாதிக்குழுவினர் நூறாண்டுகளுக்கு முன்னர் கூட 'பள்ளி' என்றழைக்கப்பட்டனரே தவிர வன்னியர் என்றல்ல. பள்ளி என்ற தமது சாதிப்பெயரை அக்னிகுல சத்திரியர் அல்லது வன்னியர்குலம் என மாற்றுமாறு 1833 தொடக்கம் போராடி கடைசியில் 1931 இல் தான் பள்ளி என அவர்களை அழைக்கும் வழக்கம் நிறுத்தப்பட்டு வன்னியர்கள்  என அழைக்கப்படும் வழக்கம் தொடங்கப்பட்டது. இருபதாம் நூற்றாண்டில் தான் பள்ளி சாதியினர் வன்னியர் என அழைக்கப்படத் தொடங்கினர் என்பது குறிப்பிடத் தக்கது.
    
   ஆகவே அதற்கு முன்பாக இலங்கைக்குக் குடியேறிய, கோணேசர் கோயில் கல்வெட்டில் குறிக்கப்பட்டுள்ள வன்னியர்கள் என்பது நிச்சயமாக பள்ளி சாதியினரை (இக்கால வன்னியர்கள்) அல்ல, மாறாக தமிழ்நாட்டிலிருந்து இலங்கைக்குக் குடியேறிய வீரம் நிறைந்த தமிழ்ப் போர்வீரர்களின் குடும்பங்கள் எல்லாமே வன்னியர்கள் என அழைக்கப் பட்டனர் என்று தான் கொள்ள வேண்டும்.  

    மேற்கூறிய எனது கருத்தை உறுதிப்படுத்தும் வகையில் திருநெல்வேலி மாவட்டத்தில் வன்னியர்சாதியினர் மறவர்கள் எனவும் அழைக்கப்பட்டனர் என்கிறது A manual of the Tinnevelly district in the Presidency of Madras. ஆகவே இலங்கையில் குடியேறியதாக கோணேசர் கல்வெட்டு, மட்டக்களப்பு மான்மியம் போன்ற நூல்களில் கூறப்படுகிற வன்னியர்கள் மறவர்களாக அல்லது வேறு சாதியினராகவும் கூட இருக்கலாம் அல்லவா.
மறவர்களும் வன்னியர் தான் 
படையாட்சி என்பது சாதிப்பெயர் அல்ல மாறாக அது பாண்டிய அரசர்களால் போர்த்தளபதிகளுக்கு அளிக்கப்பட்ட பட்டம். அதையே பாண்டிநன்னாடுடையான் படையாட்சிகள் பாடுதும் ஆகாதே என்கிறார் திருவாசகத்தில் மணிவாசகர்.  அந்தப் பட்டமும் சாதியடிப்படையில் ஒரு குறிப்பிட்ட சாதியினருக்கு மட்டும்  வழங்கப்பட்டதல்ல. 








"அன்னை பூமியென் றும்அடங் காப்பற்றாம்
வன்னி மண்ணினின் மானத்தைக் காத்திடத்
தன்னு யிர்கொடுத் துப்புகழ் கொண்டமா
மன்னன் மாவீரன் பண்டார வன்னியன்"  

4 comments:

agnikula kshatriya said...

http://thefeudatoriesofsouthindia.blogspot.in/2016/02/cholagangan-and-karunagara-tondaiman-in.html

பனங்காமம் வன்னிமையை கடைசிவரை ஆட்சி செய்தவர் வன்னியரா இல்லை அல்லது நீங்க சொல்லும் வெள்ளாளரா?? வரலாறை மாற்ற முடியாது.மாறாது.வன்னி என்பது காடு இல்லை அது அழிக்கபட்ட பகுதி.இதற்க்கு பதில் இலங்கை வரலாற்றில் இருக்கு. இலங்கை வரலாறு எழுதிய வெள்ளாளர்கள் மறைத்த கருணாகர தொண்டைமான் வரலாறு கூறும் வன்னியர் யார் என்று உலகுக்கு கூறும்.

Trivikrama varma said...

No that is not the vanniyar history.this is the original vanniyar history
everyone to know about true vanniyar.
realvanniavaralaru.blogspot.com/2013/11/real-vannia-varalaru.html

Trivikrama varma said...

no truth of true vanniyar history is the real vanniyar is this
realvanniavaralaru.blogspot.com/2013/11/real-vannia-varalaru.html

முனிராஜ் வாணாதிராயர் said...

இலங்கையின் முற்குக வன்னியர். முக்குவர்கள் அங்கே தம்மை வன்னியன் என்கின்றனர்.கிழக்கு மாகாண முக்குவர்கள் வெள்ளாளருடன் மண உறவு கொள்கிறார்கள்.