Tuesday, January 12, 2016

தைப்பூசம் இனிமேல் தமிழ்க்கடவுள் முருகனின் நாள் அல்ல?


THAIPUSAM IN MALAYSIA
உலகம் முழுவதும் பரந்து வாழும் தமிழர்கள், பல தலைமுறைகளாக  தாய்த்தமிழகத்தின் தொடர்பை இழந்து, மொழியை மறந்து வாழும் நிலையேற்பட்டுள்ள போதிலும் கூட தமது தமிழன் என்ற அடையாளத்தை மறக்காமல் அந்த தமிழ் அடையாளத்தை விழாவெடுத்துக் கொண்டாடும் நாள் எதுவென்றால், அவர்கள் எல்லோரும் ஒருங்கிணைந்து தமிழ்க் கடவுள் முருகனுக்கு விழா எடுத்துக் கொண்டாடும் தைப்பூச விழாவாகும்.

தமிழ் முருகனின் நினைவாக, முருகனின் நாளாக உலகத்தமிழர்கள் விழா எடுக்கும் அந்த நன்னாளைத் தாய்த்தமிழகத்தில் திருமலை நாயக்கன் என்ற தெலுங்கு ஆட்சியாளரின்   நினைவு நாளாக அறிவித்தது உலகத் தமிழர்களின் முகத்தில் விழுந்த அறை மட்டுமன்றி முழுத் தமிழினத்தையும் புண்படுத்தும் செயலுமாகும். 

இதை எதிர்க்க வேண்டிய தமிழ்நாட்டுத் தமிழர்கள் வாய்மூடி மெளனிகளாக இருக்கின்றனர். இது நாள் வரை தமிழ் முருகனுக்கு மட்டும் உரியதாக இருந்த தைப்பூச நன்னாளை இனிமேல் முருகன், திருமலை நாயக்கனுடனும் பங்கு போட்டுக் கொள்ள வேண்டிய நிலையை உருவாக்கியது தமிழர்கள் முருகனுக்கு இழைத்த கொடுமை என்று கூறினால் அது மிகையாகாது.


இன்று தமிழ்நாட்டில் இவ்வளவு சாதிப்பிரிவும், பார்ப்பனர்களின் ஆளுமையும், தமிழர்கள் தமது நிலமிழந்து கொத்தடிமைகளாக இருப்பதற்கும், தமிழ் தமிழர்களின் கோயில்களிலிருந்து வெளியேற்றப்பட்டதற்கும், தமிழிசை தெலுங்கிசையாக மாறியதற்கும்  மூவேந்தர்கள் காரணம் அல்ல, சோழர்களின் வீழ்ச்சியின் பின்னர் பல நூற்றாண்டுகளாக தமிழ்நாட்டை தமிழரல்லாதார் ஆண்டதால் வந்த விளைவு தான் அது.
வந்தேறிகளுக்கு தமிழர்களின் நிலங்கள் 
பகிர்ந்தளிக்கப்பட்டு, தமிழர்கள் 
நிலமற்றவர்களாக்கப்பட்டதும். தமிழர்களின் கோயில்களிலிருந்து தமிழ்  வெளியேறியதும் ராஜ ராஜ சோழனின் காலத்தில் மதிப்பும், மரியாதை மிக்கவர்களாக இருந்த தேவ அடியார்கள் தேவடியாளாக மாற்றப்பட்டதும், தமிழரல்லாத விஜயநகர, நாயக்க ஆட்சியாளர்களின் காலத்தில் தான் என்ற உண்மையை யாரும் பேசுவதில்லை.  நாயக்கர் ஆட்சியின் கீழ் தான் 
தமிழர்களின் நிலங்களைப் பறிக்கப்பட்டு தமது நாட்டிலிருந்து தமிழ்மண்ணுக்கு குடியேற்றப்பட்ட அவர்களின் சாதியினருக்கு நிலங்கள் வழங்கப்பட்டன. இன்றும் தமிழ்நாட்டுக் கிராமப் புறங்களில் தமிழர்களை விட தமிழரல்லாத (வடுக) சாதியினர், தமிழர்களுடன் ஒப்பிடும்போது நிலச்சொந்தக்காரர்களாக காணப்படுவதற்கும் இது தான் காரணம். 

வெளியிலிருந்து நாடு பிடிக்க வந்து அவர்களை அடக்கியாண்டவர்களுக்கு அவர்களின் ஆட்சி முடிந்த பின்னரும் நினைவுநாள் கொண்டாடி விழா எடுக்கும் செயலை வேறு நாடுகளில் பார்க்க முடியாது அது தமிழ்நாட்டில் மட்டும் தான் நடக்கும்.

தமிழ்மண்ணை ஆண்ட தமிழரல்லாதோர் கோயில்களையும் மாளிகைகளையும் அவர்களின் நாடுகளிலிருந்து கொண்டு வந்த பணத்தையும் தங்கத்தையும், வெள்ளியையும் கொண்டு கட்டவில்லை. எல்லாமே தமிழ்நாட்டுக்கு வந்த பின்னர், தமிழ் மண்ணையும், தமிழர்களையும்  சுரண்டிப் பெற்றுக் கொண்டவை தான். தமிழர்களின் பணத்திலும், தமிழர்களின் உழைப்பிலும், தமிழ்நாட்டின் கருங்கல்லாலும், மண்ணாலும் கட்டப்பட்டவை தான் அவர்கள் கட்டியதாகக் கூறப்படும் கோயில்களும், மாளிகைகளும் கூட, அகவே அவையெல்லாம் தமிழர்களுக்கு மட்டும் தான் சொந்தமானவை. 

 அங்கர்வாட்டில் காரைக்காலம்மையார் 
உதாரணமாக கம்போடியாவின் அங்கர்வாட்டில் சோழர்களுக்குத் தொடர்புண்டு, சோழர்களின் கட்டிடக் கலையை அங்கேயும்  காணலாம். இன்னும் தமிழச்சி காரைக்காலம்மையார் அங்கர்வாட்டில்  அழியாமல்  அமர்ந்து  கொண்டிருக்கிறார். இவ்வளவுக்கும் முதலாம் சூரியவர்மன் கூட இந்தியாவிலிருந்து (தமிழ்நாடாகக் கூட இருக்கலாம்) போனதாகத் தான் கூறப்படுகிறது. ஆனால் தமிழர்களோ அல்லது ஏனைய இந்தியர்களோ அங்கர்வாட் கோயிலில் அவர்களுக்கும் பங்கிருப்பதாக சொந்தம் கொண்டாட முடியாது அது முழுமையாக கம்போடிய கமெர்(Khmer People) மக்களின் சொத்து, அதில் யாரும் பங்கு கேட்க முடியாது. அதே போல் திருமலை நாயக்கன் மட்டுமல்ல எந்த நாயக்கனும் தமிழ்நாட்டில் கட்டிய மாளிகையோ அல்லது கோயிலோ எல்லாமே  தமிழர்களுக்குத் தான் சொந்தமே தவிர வேறு எவருக்கும் அல்ல.

சோழர் காலத்தில் கோயிலில் தமிழ் கோலோச்சியது என்பதற்கு சோழர்களில் கல்வெட்டுகளிலேயே சான்றுகளைக் காணலாம். சோழர்காலத் தமிழை அறியக் கல்வெட்டுகள் பெரிதும் உதவுகின்றன. வடமொழி எழுத்துக்களை அகற்றிவிட்டு தமிழ் எழுத்துகளால் தமிழ் மொழி மரபுப்படி எழுத வேண்டுமென்ற நன்னூலில் காணப்படும் இலக்கண வரையறையைச் சோழர்கள் தமது கல்வெட்டுகளில் கடைப்பிடிக்கத் தவறவில்லை. சோழர் கல்வெட்டுகளில் வடமொழிச் சொற்கள் அனைத்தும்,  தமிழாக்கப்பட்டுள்ளது மட்டுமன்றி கோயில்களில் கூட தூய தமிழ்ச் சொற்கள் பயன்படுத்தப் பட்டன என்பதைக் காணக் கூடியதாக உள்ளது. அந்த நிலை மாறி தமிழர்களின் கோயில்களிலிருந்து தமிழ் வெளியேற்றப்பட்டது விஜயநகர நாயக்கர் காலத்தில் தான். அதிலும் திருமலை நாயக்கர் காலத்தில் தான் பழனி முருகன் கூட பார்ப்பன சமக்கிருத மயமாக்கப் பட்டான்.
                                                                    
வடசொற்கள்
- கல்வெட்டுச் சொற்கள்
ஏகபோகம்
- ஒரு பூ
தாம்பூலம்
- சுருளமுது
கர்ப்பக்கிரகம்
- உட்கோயில், அகநாழிகை
பரிவர்த்தனை
- தலைமாறு
பரிவட்டம்
- சாத்துக்கூறை
நைவேத்யம்
- அமுதுபடி
அவிர்பலி
- தீயெறிசோறு
கும்பாபிஷேகம்
- கலசமாட்டுதல்


ஆகவே உலகத் தமிழர்கள் தமிழ்க்கடவுள் முருகனுக்குப் பாரம்பரியமாக விழா எடுத்து வரும் தைப்பூச நன்நாளை தெலுங்கு மன்னன் திருமலைநாயக்கன் நினைவு தினமாக தமிழக அரசு அறிவித்ததை தமிழர்கள் அனைவரும் கண்டிப்பதுடன் அந்த முடிவை மறுபரிசீலனை செய்யுமாறும் கேட்டுக் கொள்ள வேண்டும். 

No comments: