Saturday, November 30, 2013

தில்லைக்கோயிலில் தமிழர்களின் உரிமையை நிலைநாட்ட ஒன்றுபடுவோம்!



உலக முழுவதுமுள்ள சைவத்தமிழர்களால் குறிப்பாக ஈழத்துச் சைவத்தமிழர்களால் கோயில் என்று போற்றப்படும் சிதம்பரம் சில தமிழெதிரிகளின் திட்டமிட்ட சதியால் மீண்டும் தமிழர்களின் கைகளை விட்டகலும் ஆபத்து ஏற்பட்டுக் கொண்டிருக்கும் வேளையில் தாய்த் தமிழகத்திலுள்ள  தமிழர்களுக்கு மட்டுமன்றி ஈழத் தமிழர்களுக்கும் சிதம்பரம் கோயிலுக்கும் உள்ள பாரம்பரிய தொடர்புகளை நினைவு கூர்ந்து, தமிழர்களின் சொத்தாகிய தில்லை ஆடவல்லானின் கோயில் தமிழர்களின் கட்டுப்பாட்டில், தமிழர்களின் கைகளில் இருக்க தமிழர்கள் அனைவரும் சாதி, மத, கட்சி, கொள்கை, வேறுபாடின்றி ஒன்றுபட வேண்டுமென்பது மட்டுமன்றி, அதற்காக போராடுகிறவர்களை தமிழர்கள் அனைவரும் ஆதரிக்க வேண்டுமென்பதையும்   ஒவ்வொரு தமிழனும் உணர வேண்டியது அவசியமாகும்.

மாணிக்கவாசகர் தமிழில் திருவாசகத்தைப் பாட அதனை தன் கையால் எழுதிக் கொடுத்தவர் சிதம்பரத்து ஆடவல்லான் என்பது சைவர்களின் நம்பிக்கை, அப்படியான கோயில் தமிழர்களின் கைகளில், அவர்களின் கட்டுப்பாட்டில்  தான் இருக்க வேண்டும் அல்லவா? அது மட்டுமன்றி ஈழத்தமிழர்கள் சிதம்பரத்துடனும், வேதாரண்யத்துடனும் கோயிலுடனும் நெருங்கிய தொடர்பை கொண்டிருந்தனர். இலங்கை சுதந்திரம் அடைந்த பின்னரும் கூட சிதம்பரத்தில் ஆருத்திரா தரிசனத்துக்கு யாழ்பாணத்திலிருந்து படகுகள் செல்வது வழக்கமாக இருந்து வந்துள்ளது.

சிதம்பரத்தை பூலோக கயிலாயமாகக் கொள்ளும் ஈழத்தமிழர்  மரபு:


ஈழத்தில் தட்சண கயிலாயம் என்றழைக்கப்படும் திருக்கோணேஸ்வரமும், திருக்கேதீஸ்வரம் போன்ற ஈழத்துக் கயிலாயங்கள் எல்லாம் போத்துக்கேயரால் அழிக்கப்பட்டு விட்ட நிலையில் சிதம்பரத்தைக் கயிலாயமாகக் கொள்ளும் மரபு இலங்கையில் தோன்றியதாலேயே வன்னிய அரசர்கள் சிதம்பரத்துக்கு பெருமளவில் தானம் செய்தனரென்பது, வன்னியனார் மட தர்மசாசனப் பட்டயத்தில் “பூலோக கைலாயமாகிய சிதம்பரத்திலே என்ற தொடர் வருவதிலிருந்து புலப்படுகிறது, 


சிதம்பரத்துக்கும் யாழ்ப்பாணத்துக்குமான நெருங்கிய தொடர்பு யாழ்ப்பாண மன்னர்களுக்கு முன்பே தொடங்கி விட்டது. யாழ்ப்பாண இராச்சியத்தின் காலத்தில்  சிதம்பரத்தில் ஈழத்தமிழர்களின் சார்பில் யாழ்ப்பாணத்தார் மடத்தை முதலில் ஏற்படுத்தியவன் யாழ்ப்பாண மன்னன் பரராசசேகரன். 

பரராசசேகரனது திருப்பணியை பற்றி விவரிக்கும் பட்டயமும், கயிலை வன்னியனார் மடதர்மசாதனப் பட்டயமும் பேராசிரியர் பத்மநாதனால்  ‘வன்னியர்’ என்ற நூலில் வெளியிடப்படுள்ளன. மன்னன் பரராசசேகரனே 1450 இல் யாழ்ப்பாணத்தை விட்டு, சிதம்பரத்துக்கு ஓடியதாகக் குறிப்பிடுகிறார் அவர்.

யாழ்ப்பாணத்தில் அன்னியர் ஆட்சியில் சைவத்துக்கும், சைவர்களுக்கும் ஏறபட்ட நெருக்கடிகளிலிருந்தும், பறங்கிகளுக்கு உணவுக்காக ஒவ்வொரு சைவசமயியும் பசுமாட்டைக்  கொடுக்க வேண்டி வற்புறுத்தியதாலும், "தமது சைவத்தமிழ்ப் பாரம்பரியத்தைக் காக்க சிதம்பரத்தைச் சரணடைதல் யாழ்ப்பாணத் தமிழர்களின்  வழக்கமாக இருந்து வந்துள்ளது." மன்னன் பரராசசேகரன் சிதம்பரத்தில் அமைத்த மடம் இராசாக்கள் தம்பிரான் மடம் என்ற பெயரில் இயங்கியது. 


யாழ்ப்பாணத்திலுள்ள வளம் நிறைந்த கிராமங்களாகிய அளவெட்டி, புத்தூர், அச்சுவேலி என்பன சிதம்பரத்திலுள்ள இந்த மடத்துக்கு மானியமாக விடப்பட்டன. 1467 இல் மன்னன் பராரசசேகரன் யாழ்ப்பாணத்துக்கு திரும்பி அரசுரிமையை மீளப் பெற்ற காலத்திலிருந்து இக்கிராமங்களின் வருவாய் சிதம்பரத்தும் பரராசசேகரன் மடத்துக்குப் போயிருந்திருக்க வேண்டும்.

சிதம்பரத்தில் கைமாறும் ஈழத்தமிழர் சொத்துக்கள்: 

போத்துக்கேயருடைய கொடுமைகளுக்குத் தப்பித் தமிழ்நாட்டுக்கு ஓடிய யாழ்ப்பாணம் திருநெல்வேலி ஞானப்பிரகாசர் கெளடதேசம் போய் வடமொழியிலும், வேதாகமங்களிலும் பெரும் புலமையெய்தி, திருவண்ணாமலை ஆதீனத்திலே துறவியாகி, சிதம்பரத்துக்கு திரும்பி வந்து, வடமொழியிலே எட்டு நூல்களும், சிவஞானசித்தியாருக்கு  உரையும் எழுதினார். இவரது புலமைச்சிறப்பு வேதாகம சமசதசாத்திர பாரங்கதர்” என்ற பட்டத்தை இவருக்குப் பெற்றுக் கொடுத்தது. ஞானப்பிரகாசர் குளம் என்ற பெயரிலே பெரியதொரு குளமும் ஞானப்பிரகாசர் மடமும், அவர் காலத்திலே சிதம்பரத்திலே தோன்றி இன்றும் நிலவுகின்றன.

யாழ்ப்பாணம் ஆறுமுகநாவலர் சிதம்பரத்தைக் கேந்திரமாகக் கொண்டு சைவசமய மறுமலர்ச்சியை வழிபடுத்த விரும்பினார் என்பது பலரும் அறிந்த விடயம். சிதம்பரத்துக்கு மற்றொரு பெயர் கோயில். கோயிற்புராணத்தை அருளியவர் உமாபதி சிவாசாரியார். சிதம்பர மான்மியத்தை தமிழ் செய்தும், கோயிற்புராணத்துக்கு உரை செய்தும் வெளிப்படுத்தியவர் நாவலர் அவர்கள்.

பராசசேகரன் காலத்திலும் ஞானப்பிரகாசசுவாமிகள் காலத்திலும் கயிலைவன்னியன் காலத்திலும் ஏற்பட்ட சிதம்பரத்துடனான தொடர்பு பதினெட்டாம் நூற்றாண்டிலும் பேணப்பட்டு வந்துள்ளது.  கயிலை வன்னியனார்மட தர்மசாசனப் பட்டயம், சகாப்தம் 1644 (கி.பி.1722 இல்) வரையப்பட்டது. வன்னியர் சிதம்பரத்திலே பரராசமகாராசாவின் கட்டளை நடத்தும் சூரியமூர்த்தித் தம்பிரானிடம் தாம் விட்ட நிவந்தங்களை ஒப்படைத்தனரென்று செப்பேடு கூறுவதால், பரராசசேகரன் முன் சிதம்பரத்தில் அமைத்திருந்ததும், கயிலை வன்னியனால் ஆதரிக்கப்பட்டிருந்துமான இராசாக்கள் தம்பிரான் மடத்தை வன்னியரும் ஆதரித்து வந்தனரென்பது புலனாகின்றது
பண்டாரவன்னியன் 
தமக்குள்ள பொதுவாக ஒற்றுமைக் குறைவால் பிணங்கிப் போகும் இயல்பு கொண்ட பனங்காமப்பற்று. கரிக்கட்டுமூலைப்பற்று, தென்னைமரவாடிப்பற்று, மேற்பற்று, முள்ளியவளை, பச்சிலைப்பள்ளி வன்னியர்களும்.  இவர்களின் ஊர்களின் குடியானவர்களும் வயலுக்கு மூன்று மரக்கால் நெல் என்ற விகிதத்திலே சந்திராதித்தியவரை சிதம்பர மடத்துக்கு தானஞ் செய்வதாகச் செப்பேடு கூறுகிறது.  ஈழத்து வன்னிமைகளும், வன்னிமைகளில் உள்ள குடியானவர்களும் ஒற்றுமைப்பட்டு சைவசமயத்தின்  பெயரால் இவ்வளவு தியாகம் செய்யும் பொது யாழ்ப்பாணத்திலே சைவசமயம் எப்படி அழியும்?  திருக்கோணமலையிலும், யாழ்ப்பானத்திலுமிருந்த கயிலாசங்கள் அழிந்து விட்ட நிலையிலே, சிதம்பரத்தைக் கையிலாசமாகக் கொள்ளும் மரபு இலங்கையில் தோன்றியதாலேயே வன்னியர் சிதம்பரத்துக்கு இவ்வளவு தானம் செய்தனரென்பது இதே சாசனத்திலே “பூலோக கயிலாசமாகிய சிதம்பரத்திலே” என்ற தொடர் வருவதிலிருந்து புலப்படுகிறது.    

சேர். ராமநாதன் சமாதிக்கோயில் (பள்ளிப்படை)

இலங்கையில்  சிங்களவர்களால் the greatest Ceylonese of all times’  என்று போற்றப்படுபவரும், சிதம்பரத்தின் ஆடவல்லானின் ஆழ்ந்த பக்தனும், தனது செல்வத்தில் பெரும்பகுதியை சிதம்பரம் நடராசர் கோயிலுக்கு எழுதி வைத்தவருமாகிய  சேர் பொன்னம்பலம் இராமநாதனின் நினைவு நாள் இன்று 30 நவம்பர் .          




Related Posts:                         

சித‌ம்ப‌ர‌த்தில் ஈழ‌த்த‌மிழ‌ர்க‌ளின் பார‌ம்ப‌ரிய‌ சின்னங்களைப் பாதுகாக்குமாறு செல்வி.ஜெயலலிதாவிட‌ம் வேண்டுகோள்.
http://www.viyaasan.blogspot.ca/2013/04/blog-post_4167.html
.

ஈழத்து வன்னியர் செப்புப்பட்டயம் - சித‌ம்ப‌ர‌ம் கைலைவ‌ன்னிய‌னார் ம‌ட‌மும், நிலங்களும் எங்கே?



Ref: 
பேராசிரியர்
கலாநிதி ஆ. வேலுப்பிள்ளை
தலைவர், தமிழ்த்துறை
யாழ்ப்பாணப் பல்கலைக்கழகம்.

http://noolaham.net
www.tamilnet.com


Friday, November 29, 2013

உடற்பருமனைக் குறைக்க ‘புதிய” கண்டுபிடிப்பு!



மேலைத்தேய நாடுகளில் உடற்பருமனைக் குறைக்கும் மருந்து, மாத்திரைகளும், உபகரணங்களும் கோடிக்கணக்கான டாலர்கள் இலாபமீட்டும் வர்த்தகமாகும். அந்த வர்த்தகத்தில் அண்மையில் மிகவும் பேசப்படுவது மட்டுமல்ல பலரும் தமது உடல் பருமனைக் குறைப்பதற்காக புதிய கண்டுபிடிப்பாக புகழ்ந்து தள்ளும் அதாவது holy grail of weight loss” என்று வியக்கும் பொருள் எதுவென்றால், இந்தியாவில் எப்படியோ எனக்குத் தெரியாது, ஆனால் இலங்கையில் பல நூற்றாண்டுகளாக இலங்கை மக்கள் குறிப்பாக சிங்களவர்கள் தமது அன்றாட உணவில் சாதரணமாக சேர்க்கும் (தமிழில்) கொறுக்காய்ப்புளி எனவும் சிங்களவர்கள் கொறக்கா எனவும் அழைக்கும் Garcinia Cambogia.
இந்தக் கொறுக்காய்ப்புளியின் சாற்றைத் தான் உடல் பருமனைக்கு குறைக்கும் அதிசய மாத்திரை அதாவது “miracle pill” என்று உடல் பருமனால் வாடும் லட்சக்கணக்கான மக்கள் போற்றுகிறார்கள்.





அமெரிக்க, ஐரோப்பிய நாடுகளின் தொலைக்காட்சிகளில் இந்தக் கொறுக்காய்ப்புளி மாத்திரையின் மகிமையைப் பற்றி நிகழ்ச்சிகளும், விளம்பரங்களும் மட்டுமன்றி பல நிறுவனங்களும் கொறுக்காய்ப்புளியிலிருந்து வெவ்வேறு மாத்திரைகளைத் தயாரித்து அது பில்லியன் டாலர் வர்த்தகமாக உருவெடுத்து வருகிறது.


கொறுக்காய்ப்புளி அல்லது Garcinia Cambogia ஈரலிலுள்ள  குளுக்கோசையும், கொழுப்பு போன்றவற்றையும் எரிப்பது மட்டுமன்றி உடலின் இரத்தோட்டம் அல்லது குருதிச்சுற்றில் வெளியேற்றப்படும் சீனியின் அளவையும் குறைக்கிறதாம்.  இரத்தத்தில் சீனியின் அளவு குறையும்போது  குரூதிக்குழாய்களில் கொழுப்பு படிவதும் குறைகின்றது. அத்துடன் கொறுக்காய்ப்புளி பாதுகாப்பான, இயற்கை மருந்துமாகும். 



இலங்கையின் பாரம்பரிய மீன்கறி சமைக்கும் முறை : 

அம்புல் தியல் (சிங்களம்) - புளித்தீயல் (தமிழ்) – Sour Fish Curry. 



What we need:

1.    மீன் துண்டுகள் -   Sail fish (thalapath)/ Halibut/ Tuna (1lb) curry size pieces 

2.     கொறுக்காய்- Gambooge (Goraka) 5 pieces  (50g)

3.     மிளகு-  Black pepper  (1/2 table spoons)
4.     கறித்தூள்   - Curry powder (3 table spoons)
5.       மஞ்சள் தூள்- Turmeric (optional) (1 tea spoon)
6.       உள்ளி- 5 Garlic cloves
7.      இஞ்சி- Small piece of ginger
8.     கறுவாப்பட்டை -  1 inch cinnamon stick
9. வெந்தயம் Fenugreek 1 tea spoon

10.     கறிவேப்பிலை-  Curry leaves
11.  பண்டான் அல்லது றம்பை இலை-A small piece of pandan leaf
12.   உப்பு- 2 Tsp. Salt
12.   பச்சை மிளகாய்- 4 Green chilies slit into half
13. வெங்காயம் 1 Onion
14. கராம்பு, ஏலக்காய்

(The quantities mentioned above are only guidelines and varies according to one’s own taste.)

Tuesday, November 26, 2013

இந்தியச் சட்டங்களின் படி மோடியின் 'குழந்தை திருமணம் (பால்ய விவாகம்)' செல்லாது?


பதினெட்டு வயதுக்குக் குறைந்தவர்கள் குழந்தைகள் (Children) என இந்திய உள்நாட்டுச் சட்டங்கள்  தெளிவாக வரையறுக்கும் போது 3 வயதில் பெற்றோர்களால் தீர்மானிக்கப்பட்டு 17 வயதில் நிச்சயதார்த்தம் நடத்தி முதலிரவே நடக்காத மோடியின் குழந்தை திருமணம் (பால்ய விவாகம்) இந்தியச் சட்டங்களின் படி செல்லாது என்கிறார் என்னுடைய குஜராத்தி நண்பர்.

Picture: Google
தனக்கு விவரம் தெரிந்தவுடன் குழந்தை திருமணத்தை கைவிட்டு, அந்த திருமணமே வேண்டாம் என, பிரம்மச்சாரியாகவே இருக்கத் தீர்மானித்துக் கொண்ட மோடி அவர்களைப் பாராட்ட வேண்டும். ஏனென்றால் அண்மையில் கூட அக்டோபர் 2013 இல் ஐக்கிய நாடுகள் மனிதவுரிமைகள் ஆணையத்தில் குழந்தை திருமணத்தையும், விருப்பமற்ற வலுக்கட்டாய திருமணங்களையும்  இல்லாதொழிப்பதற்கான தீர்மானத்துக்கு ஆதவளித்த இந்தியா, அந்த தீர்மானத்தை ஒருங்கிணைந்து சமர்ப்பிப்பதற்கு (co-sponsoring ) இறுதிக்கட்டத்தில் மறுத்து விட்டதாக மனிதவுரிமை ஆர்வலர்கள் கூறுகின்றனர்.  ஏனென்றால் அந்த தீர்மானத்தை ஆதரித்து, ஒருங்கிணைந்து சமர்ப்பித்தால் அத்தகைய  சட்டங்களை , சர்வதேச கண்காணிப்பின் கீழ் இந்தியாவில் முழுமையாக நடைமுறைப்படுத்துவது கடினமானது என்பதாலாகும் என சிலர் கருத்துத் தெரிவித்துள்ளனர். இந்த நிலை 2013 ஆண்டில்  என்றால் மோடி அவர்களின் இளமைக்காலத்தில் நிலைமை எந்தளவுக்கு மோசமாக இருந்திருக்கும் என்பதை எண்ணிப்பார்க்கலாம்.

இந்தியாவின் குழந்தைகள் திருமணத்தடைச்சட்டம், அந்த தடைச்சட்டத்தை மீறியவர்களுக்கு -பெற்றோர் உட்பட- சிறைத்தண்டனையை அளிக்கிறது.ஒவ்வொரு இரண்டாவது மணப்பெண்ணும் குழந்தையாக இருக்கும் நாட்டில், ஆக 400 பேர் மட்டுமே இந்தச் சட்டத்தின் கீழ் 2012 இல் கைது செய்யப்பட்டனர். இதிலிருந்து எந்தளவுக்கு இந்த குழந்தைத் திருமண தடைச்சட்டம் நடைமுறைப்படுத்தப்படுகிறது என்பதை நாம் அறியலாம்.

குழந்தை திருமணத்தையும், கட்டாய அல்லது வற்புறுத்தி செய்யப்படும் திருமணத்தையும் மனிதவுரிமை மீறல்களாக  வரையறுக்கிறது ஐக்கியநாடுகள் சபையின் மனிதவுரிமைகள் ஆணையத்தின் தீர்மானம்.
குழந்தை திருமணம் அல்லது பால்ய விவாகத்தில்  இந்தியா உலகில் 14வது இடத்தை வகிக்கிறது நைஜர், மாலி, பங்களாதேஷ் போன்ற நாடுகள் குழந்தை திருமணத்தில் முன்னணி வகிக்கின்றன,

. இந்தியாவில் குழந்தை திருமணம் சாதாரணமாக பரவலாக நடைபெற்ற மோடியின் இளமைக்காலத்தில் அவர் மூன்று வயதாக இருக்கும் போதே அவரது பெற்றோர் ஒருரு பெண்ணை நிச்சயித்து விட்டனர். அவரது 17வது வயதில் அவருக்கும்  14வயதுடைய ஜசோதா பென்னுக்கும் அக்கால  வழக்கப்படி திருமணமும் நடைபெற்றது, ஆனால் அதே குழந்தை திருமண வழக்கப்படி மாப்பிள்ளையும், மணப்பெண்ணும் தனிமையில் சந்திக்க அனுமதிக்கப்படவில்லை. குஜராத்தில் அக்காலத்திலிருந்த  வழக்கப்படி அந்த சந்திப்பு அல்லது முதலிரவு, கவுணா (Gauna) எனப்படும் இன்னொரு சிறப்பு திருமணச் சடங்கு /இரண்டாவது திருமணச் சடங்கு (Special Ceremony) நடந்த பின்பே நடைபெறும். ஆனால் நரேந்திர மோடிக்கும் ஜசோதா பென்னுக்கும் அந்த இரண்டாவது திருமணச் சடங்கு- Gauna நடைபெறவேயில்லை. ஆனால் தனது பதினெட்டாவது வயதில் ஆர்.எஸ். எஸ் இயக்கத்தால் ஈர்க்கப்பட்ட நரேந்திர மோடி, தனக்கு நடைபெற்ற குழந்தை திருமணத்தை ஏற்றுக்கொள்ளாமல், பிரமச்சாரியாகவே இருக்க தீர்மானித்துக்  கொண்டார். அதனால் சம்பிரதாயப்படி பெயரளவில் திருமணம் நடைபெற்றாலும் கூட, அவர் ஒரு பிரம்மச்சாரி தான். அவரது குழந்தை மணப்பெண்ணும் வேறு திருமணம் செய்யாமல் தனிமையில் இருக்க தீர்மானித்துக் கொண்டார். 

இந்தியாவில் இன்றும் பரவலாக வழக்கத்திலுள்ள குழந்தை திருமணம் அல்லது பால்ய விவாகத்துக்கு, அறியாத வயதில், வலுக்கட்டாயமாகப் பலியாக்கப்படும்  லட்சக்கணக்கான இந்தியக் குழந்தைகளில் இந்த இருவரும்  (நரேந்திரபாய் மோடியும் ஜசோதா பென்னும்)  அடங்குவர்.


Monday, November 25, 2013

மலேசியத் தமிழர்களிடம் ஈழத்தமிழர்கள் பிச்சை வாங்க வேண்டும்!






மேலைநாடுகள் எங்கும் பரவி அந்தந்த  நாட்டுக் குடியுரிமையும் பெற்று இன்று செல்வாக்கோடு வாழும் புலம்பெயர்ந்த ஈழத்தமிழர்களால் இன்னும் நடைமுறைப்படுத்த முடியாத அல்லது தமிழ், தமிழ் என்று பீற்றிக் கொண்டாலும் நடைமுறைப்படுத்த முயலாத, தமிழர்களின் ஆலயங்களை தமிழாக்கும் பணியை அதாவது  தமிழுக்கு முன்னுரிமை கொடுத்து, பார்ப்பனர்கள் அல்லாதவரும் அர்ச்சகராலாம் அதுவும் அவர்கள் தமிழில் அர்ச்சனை செய்யலாம் என்பதை உலகப் புகழ் பெற்ற பத்துமலை (Batu Caves) முருகன் கோயிலிலேயே பார்த்து அனுபவிக்கும்  பாக்கியம் சில வாரங்களுக்கு முன்பு எனக்குக்கிடைத்தது. இந்த விடயத்தில் மலேசியத் தமிழர்களிடம் ஈழத்தமிழர்கள் பிச்சை வாங்க வேண்டும்.
 
இம்முறை தீபாவளியை மலேசியாவில் கழிக்கும்  வாய்ப்பு எனக்குக் கிடைத்தது. எனது நெருங்கிய உறவினர்கள் எழுபது வருடங்களுக்கு மேலாக மலேசியாவில் வாழ்ந்து வந்தாலும் கூட இந்த முறை தான் முதன் முதலாக மலேசியாவுக்குப் போயிருந்தேன். ஆனால் இலங்கையை போல் தமிழ், தமிழர் என்ற தொடக்கத்துடன் பெயர் இல்லாமல், HINDRAF or Hindu Rights Action Force ( இந்து உரிமைகள் போராட்டக் குழு) போன்று, இந்து என்ற சொல்லுக்கு முன்னுரிமை கொடுக்கப்பட்டிருப்பதைப் பார்த்து, மலேசியத் தமிழர்கள் தமது தமிழர் என்ற அடையாளத்துக்குப் பதிலாக, இந்து என்ற அடையாளத்துக்குத் தான் முன்னுரிமை கொடுக்கிறார்கள் போலிருக்கிறது என்று நினைத்திருந்த எனக்கு பத்து மலை முருகன் கோயிலில் அர்ச்சனைத் தட்டைக் கொடுத்தவுடன், நான் கேட்காமலேயே  தமிழில் அர்ச்சனை பண்ணத் தொடங்கிய பார்ப்பனரல்லாத அர்ச்சகரை பார்த்தவுடன் எனக்கு ஆச்சரியமாக மட்டுமல்ல, மகிழ்ச்சியாகவும் இருந்தது. தமிழ்நாட்டைப் போல் தமிழில் அர்ச்சனை செய்யப்படும் என்ற அறிவிப்பும் அங்கிருக்கவில்லை. 

 தமிழில் அர்ச்சனை செய்தாலென்ன, சமக்கிருதத்தில் செய்தாலென்ன எல்லாம் ஒன்று தான் சிலர் நினைக்கலாம். ஆனால் அதில் பெரிய வேறுபாடு உண்டு என்பதை என்னால் அங்கு உணர முடிந்தது. எங்களுக்குத் தெரியாத மொழியில் பிழை பிழையாக ஐயர் ஏதோ முணுமுணுப்பதை விட, தமிழில் முருகனின் புகழைக் கூறி போற்றி, போற்றி என்று அர்ச்சனை செய்வது பக்தியுணர்வை ஏற்படுத்துகிறது என்பது மறுக்க முடியாத உண்மையாகும். இதனால் தான் தமிழ்க் கிறித்தவர்கள் லத்தீன் மொழியில் தமது பிரார்த்தனைகளை நடத்துவதை விடுத்து கிறித்தவத்தை தமிழாக்கினார்கள்.

மேலை நாடுகளில் வாழும் ஈழத்தமிழர்கள் என்னடாவென்றால் மூலைக்கு மூலை கோயில்களை கட்டி பார்ப்பனர்களுக்கு மட்டும் வேலைவாய்ப்பளித்து, சாதியை வளர்க்கும் போது உலகப்புகழ் பெற்ற பத்து மலை முருகன் கோயிலிலேயே பூணூல் அணியாத தமிழ் அர்ச்சகர்கள் மூலம் தமிழில் அர்ச்சனை செய்வித்து, தமிழ்க்கடவுள் முருகனுக்கு தமிழ் புரியும் , தமிழில் அவனை வணங்கலாம் என நடைமுறையில் செய்து காட்டி தமிழுக்கு முன்னுரிமை கொடுத்த மலேசியத் தமிழர்கள் உலகத் தமிழர்களின் பெருமதிப்புக்கும் பாராட்டுக்கும் உரியவர்கள்.


Picture Courtesy: Vinavu


அனைத்து சாதியினரும் அர்ச்சகராகும் திட்டத்தின் கீழ் பயிற்சி பெற்றவர்களை புலம்பெயர்ந்த தமிழர்களின் ஆலயங்களில் அர்ச்சகர்களாக நியமிக்க வேண்டும்.





Sunday, November 24, 2013

டேவிட் கமரூனை எதிர்த்து இலங்கை முஸ்லீம்கள் ஆர்ப்பாட்டம்!


கொழும்பில் உள்ள பிரதான பள்ளிவாசலில் நேற்று வெள்ளிக்கிழமை தொழுகையை முடித்துக் கொண்ட தமிழ் பேசும் முஸ்லீம்கள் பிரித்தானிய  பிரதமர் டேவிட் கமரூனுக்கெதிராக ஆர்ப்பாட்டத்தை நடத்தினர். டேவிட் கமரூனுக்கெதிரான வாசகங்கள் தாங்கிய பதாகைகளைக் கைகளிலேந்தியவாறு ஆர்ப்பாட்டம் செய்தனர் இலங்கை முஸ்லீம்கள்.
  
இலங்கை அரசு நடுநிலையான முறையில் போர்க்குற்ற விசாரணைகளை எதிர்வரும் மார்ச் மாதத்துக்கிடையில் நடைமுறைப்படுத்தாது விட்டால் ஐக்கிய நாடுகள் சபையில் மனிதவுரிமைகள் ஆணையத்தின் ஊடாக இலங்கையில் நடைபெற்ற போர்க்குற்றங்களை விசாரணை செய்ய சர்வதேச விசாரணையைக் கோரப் போவதாக பிரிட்டிஸ் பிரதமர் கூறியதை எதிர்த்து, அவருக்கெதிராக இலங்கையின் தமிழ் பேசும் முஸ்லீம்கள் நேற்று ஆர்ப்பாட்டம் செய்தனர்.

பிரிட்டிஸ் பிரதமர் டேவிட் கமரூன் போரினால் பாதிக்கப்பட்ட யாழ்ப்பாணத்துக்கும் சென்றிருந்தார் என்பது மட்டுமன்றி, 1948 இல் இலங்கை சுதந்திரமடைந்த பின்னர் யாழ்ப்பாணத்துக்கு சென்ற முதல் வெளிநாட்டுத் தலைவருமாவர்.

நேற்று சிங்கள பெளத்த தேசியவாதிகளும் புத்த பிக்குகளும் கொழும்பிலுள்ள ஐக்கிய இராச்சியத்தின் தூதரத்தின் முன்பாக பிரித்தானிய பிரதமர் டேவிட் கமரூனை எதிர்த்து ஆர்ப்பாட்டத்தில் ஈடுபட்டிருந்தனர் என்பதும்  குறிப்பிடத்தக்கது.